Чинаыдлы, буракö, веськодь…
Александр Николаевич Островский шулiс: театртöг войтырыд абу. Тайö дзик сiдз. Государство подуласьö культура вылi. Сiдзкö, медым вöлi ён государство, колö сылы зумыд подув — культура. А миян кыдз? Культура керкаяс, торйöн нин сиктьясын, öдва «лолалöны». Öнi сиктса клубъяс, кыдз шуласны, ва ньылыдыс кывтöны. Медым лючки кутчысьны, аслыныс колö нажöвитчыны. А кыдзи верман сикт-грездын концертъясöн ыджыд сьöм нажöвитны? Гаж дасьтöм кындзи веськöдлысьяслы колö медводз мöвпавны стрöйба дзоньталöм, аппаратура ньöбöм йылысь да с.в.
Яндзим весиг гижны, но Абъя-чой сиктса «Парма» культура керкаын абу асмогасянiыс. Аньяс ветлöны ведраö, а мужичöйяс стрöйба сайсьыс стенсö пожъялöны. Чайта, татшöм шуштöм серпасыс абу сöмын миян сиктын. Эг на ёна важöн радио пыр кывлi Иосиф Кобзонлысь сёрнисö. Гижа рочöн сылысь щуöмсö: «То ли спьяну, то ли сдуру, можно плюнуть на культуру». Тадзи, тыдалö, и артмö. Чинаясыдлы веськодь культураыд.
Библиотекаясын уджалысьяс оз вермыны судзöдны газет-журнал. Депутатъяслысь дзайгöны сьöм, мед кöть районса газетсö библиотекаас судзöдасны. А öд война да сы бöрын сьöкыд воясö быд сиктын вöлi изба-читальня, кытчö ас кадö воисны газетъяс. Ог помнит, мед сэки шулiсны, мый экономика боксянь сьöкыд кадö абу кивыв судзöдны газеттö. Öнi со лöсьöдчам пасйыны Ыджыд Вермöмсянь 66 во тырöм, а библиотекалöн абу сьöмыс районса газет судзöдöм вылö.
Гöльмöмаöсь и музейяс. Он вермы звöнитчыны – телефонсö орöдомаöсь, вештысьнысö сьöмыс абу да. Телефон йитöдтöг пукалöны и библиотекаын. Синва петмöн забедно культура вöсна!
А удждоныс культураын зiльысьяслöн — грöш. Луздор районса культура керкаын öти баянист -Александр Иванович Кладов. Енбиа ворсысь, тшöтш и сьылö. Сытöг ни öти концерт-гаж оз кольлы. Кольöм во сылöн удждоныс вöлöма кöкъямыс сюрс шайт тöлысьнас. Неважöн вочаасьлiм да шуö, верман по чолöмавны менö, удждонöй содiс 500 шайт.
Бара косавла кольöм нэмся 40-öд воясö. Абъячойын сэки уджалiс театр. Артистъясöс сэки ёна пыдди пуктiсны. Фронт выло найöс эз босьтны, мед сöмын вир кисьтана курыд кадö кыдзкö гажöдiсны войтырöс. Эз тупкысьлыны война кадö и Москваса да Ленинградса театръяс.
Сöвет власьт кадö ичöт кöть ыджыд грездын клубыд вöлi. А кыдзи нö сытöг? Köнi чукöртчывны-шойччыны уджалысь том йöзлы? Öнi жö сикт-грездын клубъяс киссьöмаось либо эмöсь кö на, сэтчö пырны оз шогмы. Кутшöм нин сэш йöктöм, пöтöлöкыс юр вылад вермас усьны. А чина йöзлы – веськодь.
Налы, буракö, бурджык ставсö пöдлавны…
Юрий БЕЛЯЕВ.
Луздор р
КОМИ МУ
а на фото реез://комиблог.рф/?p=3696 клуб в с. Помоздино
